Fon Choill

Bhuineadh Dòmhnall Moireasdan, am Megantic Outlaw, do theaghlach Leòdhasach a rinn an dachaigh ann am Megantic ann an Canada anns an dàrna leth de na 1800an.

Ged as e caractar eachdraidheil a th’ ann an Dòmhnall, tha Calum L. MacLeòid, ùghdar A’ Togail an t-Srùbain, air caractaran làidir, tarraingeach eile a chruthachadh timcheall air. Bheir iad sin, agus na h-ìomhaighean cumhachdach, fiosrachadh dhan leughadair air cho cruaidh ’s a bha beatha nan Gàidheal a chaidh a Chanada agus iad a’ sireadh beatha na b’ fheàrr agus na b’ fhasa dhaibh fhèin. Tha an èiginn fhèin aig pàrantan Dhòmhnaill agus an t-airgead gann orra. Dìreach mar a bha san t-Seann Dùthaich tha an t-airgead agus na h-ùghdarrais fhathast nan aghaidh, gun luaidh air talamh doirbh agus droch shìde.

Sgeulachd iongantach air a roinn na ochd pàirtean, uile gu math diofraichte – mar eisimpleir ’s e litrichean eadar Dòmhnall ’s a phiuthar, a mhàthair agus a bhràithrean a th’ ann am fear de na pàirtean, agus ’s e aithris a th’ ann an cuid eile.

Am Megantic Outlaw – ciamar a thèid dha?